2 Fevral Azərbaycan Gənclər Günü

Cəfər Cabbarlı adına Respublika Gənclər Kitabxanası və "GUYS" İctimai Birliyinin birgə təşkil etdiyi “2 Fevral Azərbaycan Gənclər Günü”nə həsr olunmuş tədbir keçirilib.

Tədbirdə Azərbaycan Respublikasının Mədəniyyət Nazirliyinin Nəşriyyatlarla iş sektorunun aparıcı məsləhətçisi Lalə Məmmədova, yazıçı, şair, Azərbaycan Yazıçılar Birliyinin  üzvü, Prezident təqaüdçüsü və mükafatçısı Ramil Əhməd, gənc yazar Zinyət Samir, "GUYS" İctimai Birliyinin sədri Mubariz Quliyev, "Binar School" proqramının rəhbəri Aydan Şahalıyeva, tələbə və gənclər iştirak ediblər.

Tədbiri giriş sözü ilə açan kitabxananın direktoru Aslan Cəfərov  bu gün Azərbaycanda uğurla həyata keçirilən gənclər siyasəti anlayışının bizə ulu öndər Heydər Əliyev tərəfindən miras qalmasını və bu gün də bu siyasətin cənab Prezident İlham Əliyev tərəfindən müvəffəqiyyətlə davam etdirildiyini söyləyib. Azərbaycanda gənclər siyasətinin uğurunun bariz nümunəsi olan bir sıra yerli və beynəlxalq tədbirlərin təşkilindən, “Gənclər Günü”, “Gənclər İli”, “Azərbaycan gənclərinin xarici ölkələrdə təhsili üzrə Dövlət Proqramı”, “Gənclər Fondu”nun yaradılmasından, gənclər üçün “Prezident Mükafatı”nın təsis edilməsindən, gənclərin elmi, mədəni, iqtisadi, siyasi sferalarda bir mütəxəssis kimi yetişmələrinə göstərilən daimi dəstəkdən danışıb. Artıq 50 gündən çoxdur ki,  Xankəndi-Laçın yolunda Azərbaycan gəncləri, fəal könüllülər tərəfindən "Azərbaycan oyaqdır, sərvətlərə dayaqdır!”, “Ekoloji cinayətə son!” və sair şüarların səsləndirilməsi ilə müşayət olunan dinc ekoaksiya haqqında da məlumat verib.

"GUYS" İctimai Birliyinin sədri Mübariz Quliyev bu günki gündə müasir Azərbaycan gəncliyinin yüksək dinamika ilə inkişaf etməsindən, daim öz üzərində çalışmasından, müasir texnologiya vasitələrinə marağından, sağlam rəqabət aparma qabiliyyətlərindən danışıb.

Tədbirdə kitabxananın əməkdaşları “Zəfər dastanı yazan qalib Azərbaycan gəncliyi", “Dövlətin gənclər siyasəti”, “İntellektual Azərbaycan gəncliyi”: gələcəyimizin etibarlı davamçısı” mövzularında çıxışlar ediblər.

Kitabxananın İnformasiya təminatı və media ilə iş şöbəsinin müdiri Günay Həsənova "2 Fevral - Gənclər günü"nün tarixinə nəzər salaraq, Respublika Gənclər Kitabxanasının 95 illik fəaliyyəti müddətində əsas auditoriyasının gənclərdən ibarət olmasını vurğuladı. Daim inkişaf etməkdə olan Azərbaycan gəncliyinin asudə vaxtının, mütaliəsinin təşkili, intellektual səviyyəsinin yüksəldilməsi yönümündə həyata keçirdikləri tədbirlər haqqında danışıb. "2 Fevral - Gənclər günü" ilə əlaqədar kitabxananın əməkdaşları tərəfindən hazırlanan videomaterial, ənənəvi sərgi və "Gənclər Vətənin işıqlı sabahı, nurlu gələcəyidir" adlı biblioqrafik icmal haqqında məlumat verib.

Gənc yazar Zinyət Samir gənclərdə milli-mənəvi dəyərlərin təbliği, onların vətənpərvər ruhda yetişməsi istiqamətində təhsil, mədəniyyət müəssisələrinin rolu haqqında danışaraq, nəsillərarası dialoqun, təcrübə mübadiləsinin zəruriliyi vurğulayıb.

Prezident təqaüdçüsü və mükafatçısı Ramil Əhməd ölkənin elmi, mədəni sferalarında çalışan gənclərin fəallığından, müxtəlif yerli və beynəlxalq layihələrə, proqramlara cəlb olunmalarından, daim öz peşəkarlıq səviyyələrini yüksəltmələrindən danışıb. Mədəniyyət Nazirliyi tərəfindən Şuşada təşkil edilən Vaqif Poeziya günlərində bir çox istedadlı gənclərin peşəkarlığının şahidi olmasını vurğulayıb. 

Tədbirdə kitabxananın  üç əməkdaşı - Quliyeva Şəhla, Seyidova Züleyxa və Əhmədova Nilufər kitabxanada uğurlu fəaliyyətlərinə görə fərqlənmə diplomu, on nəfər fəal gənc isə "GUYS" İctimai Birliyi tərəfindən ölkəmizin sosial və ictimai həyatında aktivlik nümayiş etdirdiklərinə görə Təşəkkürnamə ilə təltif edildilər.